काठमाडौं । नेपाल कृषि अनुसन्धान परिषद(नार्क) ले नेपालमा पहिलो पटक आलुको जात विकास गरेको छ। अरु जातका बीउलाई क्रस गरेर नयाँ जातको आलुको बीउको विकास गरिएको राष्ट्रिय आलुबाली अनुसन्धान कार्यक्रमका वैज्ञानिक सञ्जीव गौतमले बताए।
यसअघि अन्य मुलुकबाट ल्याइएका जात प्रयोगशालामा परीक्षण गरेर राम्रो नतिजा आए कार्यालयले किसानका लागि सिफरिस गर्थ्यो। यस पटक भने क्रस गरेर नयाँ जातकै रुपमा विकास गरिएको हो।
गौतमले भने,‘हामीले जिल्ला कृषि विकास कार्यालय, बीउ उत्पादक समूह, सहकारी हुँदै किसानसम्म बीउ पठाउँछौं।’
कार्यक्रमले नयाँ बीउलाई बीउ गुणस्तर जाँच केन्द्रमा पठाएको छ। केन्द्रले त्यसलाई स्वीकार गरेपछि वितरणका लागि सिफारिस गरिने गौतमले जानकारी दिए। डढुवा र अैजेरु नलाग्ने खालको आलुको जात विकास गरिएको जानकारी दिंदै उनले भने,’आलुमा लाग्ने रोग कम हुँदा किसानले राम्रो आम्दानी गर्न सक्नेछन्।’
कार्यक्रमले अहिलेसम्म १० जातका आलुको बीउ किसानलाई वितरण गरेको छ। फरक ठाउँको हावापानी र मौसमअनुसार ती बीउ रोप्दा किसानले राम्रो उत्पादन लिन सक्छन्। पछिल्लो समयमा डढुवा नलाग्ने जात नै कार्यालयले सिफारिस गरिरहेको छ।
आलु उत्पादन हुने क्षेत्रफलका हिसाबले नेपालको पाँचौं र उत्पादकत्वका हिसाबले पहिलो बाली हो। नेपालका अधिकांश जिल्लामा आलुको खेती हुने गरेको छ।
