ललितपुर। नेपाल कृषि मेसिनरी व्यवसायी संघ (नामिया) र कृषि तथा पशुपन्छी विकास मन्त्रालय अन्तर्गतको कृषि विभाग, कृषि पूर्वाधार विकास तथा कृषि यान्त्रीकरण प्रवद्र्धन केन्द्र को संयुक्त आयोजनामा छैठौं राष्ट्रिय कृषि यान्त्रिकरण प्रदर्शनी आगामी मंसिर १२ देखि १४ गतेसम्म काठमाडौँको भृकुटीमण्डप प्रदर्शनी हलमा हुने भएको छ ।
‘कृषिमा यन्त्र र प्रविधिः कृषक र राष्ट्रको समृद्धि’ भन्ने मूल नाराका साथ आयोजना हुने प्रदर्शनीमा करिब २० मुलुकका १५० भन्दा बढी प्रदर्शनीकर्ताले २०० भन्दा बढी स्टलमार्फत २ हजारभन्दा बढी प्रकारका आधुनिक कृषि औजार, उपकरण, यन्त्र तथा प्रविधिहरू प्रस्तुत गर्ने जनाइएको छ ।
नेपालमा कृषि यान्त्रिकरण प्रवर्धन गर्ने उद्देश्यले विसं २०७० सालमा चितवनबाट सुरू गरिएको यो प्रदर्शनी हालसम्म पाँच पटक राष्ट्रिय, एक पटक प्रादेशिक र एक पटक अन्तर्राष्ट्रिय एग्रीटेक प्रदर्शनी सम्पन्न भइसकेको छ । यस वर्षको प्रदर्शनीमा आधुनिक कृषि, पशुपन्छीपालन, मत्स्यपालन, पुष्प खेती, व्यवसायिक तरकारी खेती, सिँचाइ, पोष्ट हार्भेष्ट, प्रशोधन तथा बजारीकरणसम्बन्धी नवीनतम यन्त्र, उपकरण तथा प्रविधिका साथै बीउबिजनका राष्ट्रिय तथा अन्तर्राष्ट्रिय उत्पादक र विक्रेताहरू सहभागी हुने आयोजकले जनाएको छ ।
आयोजकले प्रदर्शनीले कृषकलाई आधुनिक कृषि यन्त्र र प्रविधि सम्बन्धी जानकारी दिने, कृषि प्रणालीको आधुनिकीकरण र व्यवसायीकरणलाई टेवा पुर्याउने तथा नीति निर्माता, व्यवसायी, अनुसन्धानकर्ता, विद्यार्थी र कृषकबीच समन्वय गर्ने अपेक्षा राखेका छन् । साथै प्रदर्शनीमार्फत कृषक, सहकारी संस्था, बैंक तथा वित्तीय संस्था लगायत सरोकारवालाबिच सहकार्यको वातावरण सृजना हुने विश्वास आयोजकको छ ।
स्टल बुकिङ भाद्र ४ गते देखि खुला गरिएको आयोजकले जनाएको छ भने प्रदर्शनी हेर्नका लागि प्रवेश निःशुल्क गरिएको छ ।
