![](https://krishipatrika.com/kp-content/uploads/2018/04/mango.jpg)
उदयपुर। उदयपुरमा यसपटक आँप र लिचीका बोटमा लटरम्म फूल फुलेपछि कृषक खुशी भएका छन् । त्रियुगा नगरपालिकाको जोगीदह, श्रीपुर, राजाबास, चुहाडे, कौवाइ, बगाहा, मोतिगडा, पोर्ताहा, लक्ष्मीपुर, असारी क्षेत्रसहित चौदण्डीगढी नगरपालिकाको हडिया, जोगीदह, बसाहा क्षेत्रमा अहिले आँप र लिचीका बोटमा फूल राम्रैसँग फुलेपछि कृषक राम्रै उत्पादन हुनेमा आशावादी भएका छन् ।
त्यसैगरी बेलका नगरपालिका क्षेत्रको पुरनदह, तपेस्वरी, भागलपुरसहितका सिवाइ सुन्दरपुर क्षेत्रमा अहिले आँपका बोटमा स–साना फल लाग्न थालेको छ । त्रियुया नगरपालिका–२ खैजनपुरका कृषक देवकृष्ण राजधामी भन्नुहुन्छ, “विगतमा भन्दा यसपटक आँप र लिचीका बोट धेरै फुलेर फल लागेका छन्, हावाहुरीले बिगारेन भने आँप र लिचीको उत्पादन धेरै हुन्छ ।”
चौदण्डीगढी नगरपालिका–५ सिवाइ सुन्दरपुरका कृषक देवनारायण चौधरीले पाँच वर्षमा अहिले आँप र लिचीको राम्रो फूल फुलेको छ भन्नुभयो । जिल्ला कृषि ज्ञान केन्द्र उदयपुरका अनुसार सात सय ७० हेक्टर क्षेत्रफलमा आँपखेती र एक सय ५० हेक्टर क्षेत्रफलमा लिचीखेती गरिएको छ । वर्षाले क्षति नगरे यसवर्ष आँप र लिचीको राम्रो उत्पादन हुनेमा आशावादी भएको ज्ञान केन्द्र उदयपुरका अधिकृत तथा सूचना अधिकारी महेश चौधरी बताउनुहुन्छ ।
रासस