काठमाडौँ। अब माटोबिना ट्रेमा पानी हालेर घाँस, फलफूल र तरकारी उमार्न सकिने भएको छ । विज्ञहरुले यो प्रविधि हाइड्रोपोनिक्सलाई प्रवर्द्धन गरिनुपर्नेमा जोड दिएका छन् ।
हाइड्रोपोनिक्स नेपालले शनिबार गरेको कार्यक्रममा कृषि विकास मन्त्रालयका सहसचिव एवम् प्रवक्ता डा योगेन्द्र कार्कीले जापान र कोरिया भ्रमणमा गएकाबेला यो प्रविधिबाट तरकारी, फलफूल र घाँस उमारिएको पाएपछि आफूले नेपालमा पनि भित्र्याउन खोजेको जानकारी दिनुभयो ।
‘आर्थिक वर्ष २०७४-२०७५ को नीति तथा कार्यक्रम र बजेटमा पनि यो प्रविधिलाई प्रवर्द्धन गर्न बजेट छुट्याइएको छ,’ उहाँले भन्नुभयो, ‘यसले कम खर्चमा थोरै जनशक्तिका भरमा तरकारी, फलफूल र घाँस उत्पादन गर्न सकिन्छ ।’
करिब ४० हजारकै लगानीमा पाँचजनाको परिवारलाई पुग्ने फलफूल र तरकारी यो प्रविधिबाट एक हप्तामै उमार्न सकिने प्रवक्ता कार्कीले सुनाउनुभयो ।
कार्यक्रममा राष्ट्रिय चरण तथा पशु आहार केन्द्रकी प्रमुख डा नम्रता सिंहले कम सिँचाइ र जनशक्तिले पनि यो पद्धतिबाट फलफूल, तरकारी र घाँस उत्पादन गर्न सकिने अनुभव सुनाउनुभयो ।
कार्यक्रममा हाइड्रोपोनिक्स केन्याका निर्देशक पेट चेज, हाइड्रोपोनिक्स नेपालका अध्यक्ष नीलमणि सापकोटा र खरायो सहकारी अभियानका अध्यक्ष रामु पण्डितले जमारे घाँस प्रविधि पनि भनिने हाइड्रोपोनिक्सबाट रोपिने फलफूल अरुभन्दा राम्रो हुने जानकारी गराउनुभयो ।
