images
चितवन । दैनिक उपभोग्य वस्तुको मूल्य वृद्धि अकासिएपछि जिल्ला प्रशासन कार्यालय चितवनले सोमबार नारायणगढको तरकारी बजारमा अनुगमन गरेको छ ।
चाडको मुखमा विशेष गरी तरकारीमा मूल्यवृद्धि भएको गुनासो आउन थालेपछि प्रशासन कार्यालयले अनुगमनमा ध्यान केन्द्रित गरेको हो । ‘अनुगमनका क्रममा केही व्यापारीहरुले २० प्रतिशत बढी नाफा राखेर तरकारी बेचेको पाइयो’ जिल्ला प्रशासन कार्यालय चितवनका खाद्य निरीक्षक नवीन देउजाले भने, ‘ती व्यापारीलाई जिल्ला प्रशासन कार्यालयले भरतपुरले उप–महानगरपालिकासँग समन्वय गरी तत्काल बोलाएर आवश्यक छानविन गर्नेछौँ ।’
अनुगमन टोलीले तरकारी व्यवसायीलाई २० प्रतिशत बढी मूल्यमा तरकारी बेचेको पाइएमा कालोबजारी ऐनअन्तर्गत कारबाही गर्ने निर्देशन पनि दिएको छ ।
नारायणगढकै मुख्य तरकारी बजारमा पनि अनुगमन कम हुने गरेको स्वयम् व्यापारीहरुले नै बताएका छन् । दैनिकरुपमा तरकारीको मूल्य फेरबदल भइरहने व्यवसायमा अनुगमन नै नहुनु दुःखद भएको तरकारीमण्डीका व्यवसायी बाबुराम घिमिरले बताए । ‘सधैंजसो अनुगमन भइरहनु पर्ने ठाउँमा पहिलो पटक अनुगमन टोली आएको थाहा पाएँ ।’ उनले भने, ‘बजारका थोक बिक्रेताहरुकै बीचमा अस्वस्थ प्रतिस्पर्धा हुँदा उपभोक्ता मारमा परेको हो । ’
फलफूल तथा ताजा तरकारी व्यवसायी संघ चितवनका अध्यक्ष थिरप्रसाद धितालले चाडपर्व नजिकिएकै कारण तरकारीको मूल्य वृद्धि नभएको दाबी गरेका छन् । अहिलेको मौसममा चितवनको तराई क्षेत्रमा तरकारीको उत्पादन कम हुने भएकोले जिल्लाको पहाडी गाविसका साथै मकवानपुर र धादिङलगायतका बाहिरी जिल्लाबाट तरकारी आयात गर्नुपरेकोले बजारमा तरकारीको मूल्य केही प्रतिशत बढेको उनले बताए । ‘उत्पादन कम र माग बढी हुँदा मूल्य बढ्नु स्वभाविक हो’ उनले भने ।
बारीबाट सस्तो मूल्यमा आएको तरकारी उपभोक्तासम्म पुग्दा दोव्बर तेव्बर मूल्य हुँदा पनि कारबाही गर्ने निकाय नहुँदा उपभोक्ताहरु दैनिक रुपमा महँगीको मारमा परिरहेका छन् । उत्पादनस्थलबाट बजारसम्म आइपुग्दा व्यापारीहरुले बीचैमा किनबेच गरेका कारण तरकारीजन्य वस्तुको मूल्य अकासिएको हुन सक्ने उपभोक्ताहरुको बुझाइ छ ।